Brieftext

Cum, sicut accepimus, Monasterium Griffense Ordinis Praemonstratensis situatum in Provincia Carintiae in Diocesi Salisburgensi maxima in ₂₀₀spiritualibus ac temporalibus directione et reparatione indigeat, nos de tuae Fraternitatis fide, prudentia, integritate ac religionis zelo plurimum in Domino confisi, Motuproprio et ex certa scientia et mera deliberatione nostra Tibi per praesentes committimus et mandamus, ut Monasterium praedictum auctoritate nostra visitare et tam in capite quam in membris reformare, ac in eorum statum, vitam, ritus et disciplinam ac mores diligenter inquirere, quacumque mutatione, correctione, reformatione, emendatione, revocatione, innovatione ac etiam ex integro editione indigentem cognoveris, iuxta canonicas sanctiones et sacri Tridentini Concilii decreta ac dicti ordinis regularia instituta ^amutandi, corrigendi, reformandi, revocandi, innovandi , ac etiam ex integro condere, condita decretis concilii Tridentini et sacris canonibus non repugnantia confirmare, abusus quoscumque tollere, regularem observantiam et monasticam disciplinam, ubi collapsa fuerit, modis congruis restituere ac reintegrare. Praeterea, quia, ut etiam accepimus, licet praedictum Monasterium valde celebre ac insigni structura extructum multorum Canonicorum capax sit eiusque reditus ad quinque millia circiter florenorum ascendant illique aliquot parochiales Ecclesiae subsint et in eo regularis disciplina per multos annos valde floruerit, nunc tamen non solum antiqui splendoris species, sed omnis fere Religionis forma inde evanuisse videatur eiusque modernus Praepositus ob varias causas, sed praecipue ob adversam valetudinem ad illius regimen inhabilis censeatur, nec alii in eodem Monasterio ad huiusmodi regimen apti reperiantur, propterea, ne aliqui in dicti Monasterii administratione subintrent, qui illius bona dissipent, ac Religione divinoque cultu neglectis omnia in proprios usus convertant, providendum censentes, tibi pariter praecipimus et mandamus, ut personam aliquam idoneam, sive ex ipso ordine Praemonstratensi, sive ex alia Religione, aut aliquem etiam Presbyterum saecularem vita ac morum integritate et religionis zelo praeditum ac in spiritualibus circumspectum et in temporalibus providum, eidem Monasterio quacumque electione seu postulatione de altra persona facta seu facienda prorsus neglecta, auctoritate nostra apostolica praefici, aut in illius Administrationem ad tempus tibi benevisum deputari curis et facies, contradicentes quoscumque eisque auxilium, consilium vel favorem publice vel occulte, directe seu indirecte quomodolibet praestantes, quacumque auctoritate et dignitate fungentes, per censuram et poenas ecclesiasticas etiam saepius aggravandas aliaque opportuna Juris et facti remedia appellatione postposita compescendo, invocato alias ad hoc, si opus fuerit, auxilio bracchii saecularis. Super quibus omnibus et singulis plenam, liberam et amplam tibi per praesentes facultatem et auctoritatem concedimus et impartimur, mandantes propterea in virtute sanctae ₂₀₁obedientiae ac sub indignitatione nostra aliisque pro tempore declarandi censuris et poenis ecclesiasticis dilectis filiis Praepositis et Canonicis ac personis eiusdem Monasterii aliisque ad quos spectat, ut Tibi in omnibus et singulis ad huiusmodi visitationem, corectionem, et reformationem aliaque praemissa pertinentibus respective prompte pareant, obediant et assistant. Non obstantibus quibusvis apostolicis ac in generalibus, Provincialibus, et synodalibus Conciliis editis generalibus, vel specialibus constitutionibus et ordinationibus ac Monasterii et ordinis praemonstratensis iuramento, confirmatione apostolica vel quavis firmitate alia roboratis statutis et consuetudinibus, privilegiis quoque, indultis, exemptionibus, et literis apostolicis eidem Monasterio ac illius ordini sub quibuscumque verborum formis et tenoribus, et cum quibusvis etiam derogatoriarum derogatoriis aliisque efficacioribus et insolitis clausulis ac irritantibus et aliis decretis in contrarium praemissorum quomodolibet concessis, confirmatis et approbatis: quibus omnibus et singulis eorum tenores praesentibus pro expressis et ad Verbum insertis habentes, hac vice duntaxat specialiter et expresse derogamus caeterisque contrariis quibuscumque.