Brieftext

Cum, sicut nobis nuper exponi fecisti, tu literas apostolicas super provisione, et praefectione de persona tua Ecclesiae Adriensis per nos factae ₆hactenus expedire non potueris, nec infra tempus sex mensium tibi ad hoc praefixum illas expedire possis ac propterea nobis humiliter supplicari feceris, ut temporis huiusmodi prorogare de benignitate Apostolica dignaremur, nos te specialibus favoribus et gratiis prosequi volentes, ac literarum nostrarum in forma Brevis expeditarum super adipiscenda dictae Ecclesiae possessione tibi concessarum tenorem presentibus pro expresso habentes, huiusmodi supplicationibus inclinati tempus sex mensium praedictorum nondum elapsum ad alios tres menses, intra quos huiusmodi literas apostolicas omnino expedire tenearis, auctoritate Apostolica tenore praesentium extendimus et prorogamus, decernentes Ecclesiam praedictam interim non vacare, ac irritum, et inane quicquid secus super his a quoquam quavis auctoritate scienter vel ignoranter contigerit attentari. Non obstantibus constitutionibus et ordinationibus Apostolicis, ac omnibus illis, quae in praefatis literis voluimus non obstare, caeterisque contrariis quibuscumque.